హైదరాబాద్ మెట్రో రైలు ప్రాజెక్ట్‌ను రాష్ట్ర ప్రభుత్వం అధికారికంగా స్వాధీనం చేసుకోనుంది. ప్రాజెక్ట్‌కు సంబంధించిన సుమారు ₹13,000 కోట్లు ఉన్న అప్పును ప్రభుత్వం తీసుకుంటూ, అదనంగా ₹2,000 కోట్లు ఎల్ & టీ పెట్టుబడులపై వన్‌టైమ్ సెటిల్‌మెంట్‌గా చెల్లించేందుకు అంగీకరించింది.
ఈ నిర్ణయం, ప్రాజెక్ట్ యొక్క ఫేజ్-2 కు కేంద్ర ప్రభుత్వ ఆమోదం త్వరితగతిన పొందేందుకు జరిగిన చర్చల తర్వాత తీసుకున్నారు. ఇంతకాలం L&T మెట్రో రైలు ప్రాజెక్ట్ నుండి బయటపడుతుందని ఊహాగానాలు మాత్రమే వినిపించాయి, అయితే అప్పు భారంతో పాటు లాభాలు రాకపోవడం వల్ల L&T ఈ ప్రాజెక్ట్‌లో ఇక కొనసాగబోమని స్పష్టంగా తెలిపింది.
L&T, ట్రాన్స్‌పోర్ట్ కన్సెషన్ ఆస్తుల యాజమాన్యం మరియు నిర్వహణ వ్యాపారం నుంచి పూర్తిగా నిష్క్రమించామని, కాబట్టి ఫేజ్-2లో భాగస్వామ్యం కావడం సాధ్యం కాదని ప్రకటించింది.
హైదరాబాద్ మెట్రో నెట్వర్క్ పొడవు తగ్గింది
తెలంగాణ ప్రభుత్వ ప్రకటన ప్రకారం, హైదరాబాద్ ఇప్పుడు దేశంలో మెట్రో నెట్వర్క్ పొడవు పరంగా తొమ్మిదో స్థానానికి పడిపోయింది. రాష్ట్ర ప్రభుత్వం ఇప్పటికే ఫేజ్ 2A మరియు 2B విస్తరణ కోసం 8 లైన్ల ప్రతిపాదనలు సమర్పించింది. వీటితో కలిపి సుమారు 163 కిలోమీటర్ల అదనపు మెట్రో నెట్వర్క్ ఏర్పడనుంది.
కేంద్ర ప్రభుత్వ షరతులు
కేంద్ర ప్రభుత్వం ఫేజ్-1 మరియు ప్రతిపాదిత ఫేజ్-2 ఆపరేషన్ సమగ్రత కోసం డెఫినిటివ్ అగ్రిమెంట్ తప్పనిసరి అని రాష్ట్రానికి తెలియజేసింది. ఈ ఒప్పందంలో రెవెన్యూ మరియు ఖర్చుల పంచుకోలు విధానం వంటి అంశాలు ఉండాలని కోరింది.
కేంద్రం, L&Tని ఫేజ్-2లో జాయింట్ వెంచర్ భాగస్వామిగా కొనసాగమని అభ్యర్థించింది. అయితే L&T ఫేజ్ 2A, 2Bలో భాగస్వామ్యం చేయలేమని, అలాగే డెఫినిటివ్ అగ్రిమెంట్ సంతకం చేయలేమని స్పష్టం చేసింది. బదులుగా, ఫేజ్-1 మెట్రోలో తన మొత్తం వాటాను రాష్ట్ర లేదా కేంద్ర ప్రభుత్వానికి విక్రయించడానికి సిద్ధంగా ఉన్నట్లు తెలిపింది.
సీఎం రేవంత్ రెడ్డి జోక్యం
తెలంగాణ ముఖ్యమంత్రి రేవంత్ రెడ్డి మరియు ఉన్నతాధికారులు L&Tని ఒప్పించే ప్రయత్నం చేశారు. అయినప్పటికీ, సంస్థ తన నిర్ణయాన్ని మార్చుకోలేమని, ట్రాన్స్‌పోర్ట్ కన్సెషన్ ఆస్తుల యాజమాన్యం నుంచి పూర్తిగా నిష్క్రమించామని మరోసారి స్పష్టం చేసింది.
తదుపరి చర్చల్లో ఫేజ్-1 ప్రాజెక్ట్ ఆర్థిక లావాదేవీలు, ఆస్తుల విలువ లాంటి అంశాలపై చర్చలు జరిగాయి. రాష్ట్ర ప్రభుత్వం ప్రకటనలో, టేకోవర్ నిబంధనలు పరస్పర అంగీకారంతో, చట్టపరంగా మరియు నిబంధనలకు అనుగుణంగా నిర్ణయిస్తామని తెలిపింది.
పాతబస్తీ మెట్రో పనులు వేగవంతం
ఇకపుడు రాష్ట్రం పాతబస్తీలో మెట్రో విస్తరణపై దృష్టి సారించింది.
-
MGBS – చాంద్రాయణగుట్ట మధ్య 5.5 కిమీ మెట్రో కారిడార్ పనులు వేగవంతం అయ్యాయి.
-
ప్రాపర్టీ సేకరణను తగ్గించేలా రూట్‌ రీడిజైన్ చేశారు.
-
ప్రభావిత ప్రాపర్టీలు 1,100 నుంచి 900కి తగ్గించబడ్డాయి.
-
ఇప్పటి వరకు 412 ప్రాపర్టీలకు పరిహారం చెల్లించబడింది, 380 పూర్తిగా కూల్చివేయబడ్డాయి.
-
ఇప్పటికే ₹360 కోట్లు యజమానులకు చెల్లించారు.
పిల్లర్ లొకేషన్లు 25 మీటర్ల దూరంలో గుర్తించి, జియోటెక్నికల్ పరిశోధనలు ప్రారంభించారు. DGPS సర్వే ద్వారా పిల్లర్, స్టేషన్ స్థానాలు ఖరారు చేసి చారిత్రక, ధార్మిక కట్టడాలకు భంగం కలగకుండా చూసుకుంటున్నారు.
