గత రెండు రోజులుగా నేపాల్లో నిరసనలు హింసాత్మకంగా మారి ప్రభుత్వ భవనాలపై దాడులకు దారి తీసాయి. ఈ పరిస్థితుల్లో సెప్టెంబర్ 9 రాత్రి నుంచి దేశ భద్రతా నిర్వహణను తన ఆధీనంలోకి తీసుకున్నట్లు నేపాల్ సైన్యం ప్రకటించింది. భారత ప్రభుత్వం నేపాల్లో ఉన్న భారతీయులు బయటకు వెళ్లకుండా ఇండోర్స్లోనే ఉండాలని సూచిస్తూ సలహా జారీ చేసింది. ఇదే సమయంలో పలు భారతీయ ఎయిర్లైన్స్ కాఠ్మండు విమాన సర్వీసులను నిలిపివేశాయి. విద్యార్థుల ఆధ్వర్యంలో ప్రారంభమైన “Gen Z” నిరసనలు మొదట సోషల్ మీడియా బ్యాన్పై ఆగ్రహంగా మొదలై, తరువాత అవినీతి ఆరోపణలు, ప్రజల పట్ల నిర్లక్ష్యం, కేపీ శర్మ ఒలీ ప్రభుత్వంపై వ్యతిరేకతగా విస్తరించాయి.
నేపాల్లో తీవ్ర నిరసనలు రెండో రోజు కూడా కొనసాగుతుండగా, సోషల్ మీడియా నిషేధాన్ని ప్రభుత్వం సోమవారం అర్ధరాత్రి ఎత్తివేసినప్పటికీ, భారీ ఒత్తిడికి లోనైన ప్రధానమంత్రి కేపీ శర్మ ఒలీ రాజీనామా చేశారు. నిరసనకారులు పలు ప్రభుత్వ కార్యాలయాలను ఆక్రమించడమే కాకుండా పార్లమెంట్ భవనాన్ని, పలువురు అగ్రనేతల ఇళ్లను కూడా దహనం చేశారు. అంతకుముందు హింసలో 19 మంది ప్రాణాలు కోల్పోయిన సంగతి తెలిసిందే.
-
కాఠ్మండు సహా పలు పట్టణాల్లో ఆర్మీ పహారా కొనసాగుతుంది
-
నిరసనకారులు–పోలీసు మధ్య ఘర్షణలు; పరిస్థితి ఇంకా తీవ్రంగానే ఉంది
-
అశాంతి నేపథ్యంలో భారత్–నేపాల్ సరిహద్దు వద్ద భద్రత కట్టుదిట్టం
-
ప్రధాన నగరాల్లో కర్ఫ్యూ అమలు, రవాణా తీవ్రంగా దెబ్బతింది
-
అంతర్జాతీయ వర్గాలు శాంతి పునరుద్ధరణకు పిలుపునిస్తున్నాయి
